مدينة جديدة

مدينة جديدة

كل سنة وانتم طيبين .. الايام دي بنعيش افراح وانتصارات القيامة و الرب عنده رغبة اكيدة ان كلنا نقوم معه ونتجدد .. الرب دايما بيبص علي كنيسته وعايز يجمعها ويبنيها من جديد .. واذا كان ايليا عنده غيره وبني مذبح الرب المنهدم (1مل18: 30) وحزقيا كان عنده غيره وبني اسوار اورشليم المنهدمة  (2أخ32: 5) ونحميا كان عنده غيرة وبني اسوار اورشليم فالرب عنده غيرة علي كنيسته وعايز يبنيها من جديد ويعمل مدينة جديدة عشان تشوف الامم وتعرف مجد الرب

 يقول الرب في حز36: 36  

فَتَعْلَمُ الأُمَمُ الَّذِينَ تُرِكُوا حَوْلَكُمْ أَنِّي أَنَا الرَّبُّ، بَنَيْتُ الْمُنْهَدِمَةَ وَغَرَسْتُ الْمُقْفِرَةَ. أَنَا الرَّبُّ تَكَلَّمْتُ وَسَأَفْعَلُ.  "

الرب هيبني المدينة دي ازاي ؟ تعالوا نتأمل مع بعض في 3 ايات من اشعياء 54 يقول الوحي المقدس في عدد (10)

" 10فإنَّ الجِبالَ تزولُ، والآكامَ تتزَعزَعُ، أمّا إحساني فلا يَزولُ عنكِ، وعَهدُ سلامي لا يتزَعزَعُ، قالَ راحِمُكِ الرَّبُّ."أيَّتُها الذَّليلَةُ المُضطَرِبَةُ غَيرُ المُتَعَزِّيَةِ، هأنذا أبني بالأُثمُدِ حِجارَتَكِ، وبالياقوتِ الأزرَقِ أؤَسِّسُكِ، 12وأجعَلُ شُرَفَكِ ياقوتًا، وأبوابَكِ حِجارَةً بَهرَمانيَّةً، وكُلَّ تُخومِكِ حِجارَةً كريمَةً، "(اش54: 10)

هنتامل حتة حتة باذن الرب وربنا يدينا فهم ويبارك في الكلمة بروحه القدوس ... امين

الجِبالَ تزولُ، والآكامَ تتزَعزَعُ، أمّا إحساني فلا يَزولُ عنكِ، وعَهدُ سلامي لا يتزَعزَع قال راحمك الرب

الرب بيقولنا عارفين الجبال شديدة كد ايه وبيضرب بيها المثل في الشدة .. لكن حتي الجبال والاكام بتزول

الاكام هي التلال المرتفعة وهي اقل من الجبل شوية والمفرد ( اكمة)

++ الجبال بتزول اما بفعل عوامل التعرية من رياح وامطار وغيره .....

++ او بتزول بسلطان الرب.. زي ما قالنا مزمور104 ". يَمَسُّ الجِبالَ فتُدَخِّنُ."

وزي ما قال معلمنا حبقوق" نَظَرَ فرَجَفَ الأُمَمُ ودُكَّتِ الجِبالُ الدَّهريَّةُ وخَسَفَتْ آكامُ القِدَمِ.  " (حب3: 6)

++ وممكن الجبال تزول بسلطان نقل الجبال اللي اداه لعياله في مر11: 23

" ²³لأنِّي الحَقَّ أقولُ لكُمْ: إنَّ مَنْ قالَ لهذا الجَبَلِ: انتَقِلْ وانطَرِحْ في البحرِ! ولا يَشُكُّ في قَلبِهِ، بل يؤمِنُ أنَّ ما يقولُهُ يكونُ، فمَهما قالَ يكونُ لهُ. " (مر11: 23)

++ اخيرا الجبال ممكن تزول بسلطان العلم اللي اداه الرب للبشرية بالديناميت زي ما زالوا بعض الجبال اللي في العين السخنة عشان يوسعوا السكة او زي ما بيحصل في المحاجر وبينسفوا الجبال .

والرب هنا عايز يفهما ان الجبال والاكام ممكن تزول .. لكن في حاجتين ما يزولوش ابدا هما : احسان الرب وعهد سلامه

أمّا إحساني فلا يَزولُ عنكِ:

لما نقلب في حياتنا هنشوف ان احسانات الرب لا تحصي والرب بيقول عن نفسه

" وَأَصْنَعُ إِحْسَانًا إِلَى أُلُوفٍ مِنْ مُحِبِّيَّ وَحَافِظِي وَصَايَايَ." والاية قالها الرب مرتين (خروج 20 ,  تث 5 )

+ والاحسانات دي اما بتكون روحية .... ناس فرحانة بالروح علي طول وهم العالم مش تعبها ... ناس اداها الرب مواهب روحية تصلي للعيان يخف وناس تخرج شياطين وناس تشوف رؤي واحلام جميلة والرب يعزيها وناس يكشف لها المستقبل ..

+ واما  تكون مادية ... لما تضيق الدنيا نرفع عينينا للجبال نلاقي معونة (مز121) هو القادر ان يشبع الجميع يشبع شعبه وتفضل 12 قفة (متي14) ويشبع الامم التي تقبله ويزيد 7 سلال (متي15) وزي ما بيقول المرنم في مز37

" 25أيضًا كُنتُ فتىً وقد شِختُ، ولم أَرَ صِدِّيقًا تُخُلِّيَ عنهُ، ولا ذُرِّيَّةً لهُ تلتَمِسُ خُبزًا. 26اليومَ كُلَّهُ يترأَّفُ ويُقرِضُ، ونَسلُهُ للبَرَكَةِ. " (مز37) يتمجد اسمك يا رب

+ كمان في احسانات مستخبية وهي المصايب والمشاكل اللي بيمنعها الرب توصل لنا   

بيكلمنا عنها معلمنا ارميا في المراثي 3: 22

"22إنَّهُ مِنْ إحساناتِ الرَّبِّ أنَّنا لم نَفنَ، لأنَّ مَراحِمَهُ لا تزولُ. 23هي جديدَةٌ في كُلِّ صباحٍ" (مراثي3: 22)

بنصحي كل يوم الصبح ولا بنلتفت لاحسانات الرب ... مين اللي كان مشغل قلبنا واحنا نايمين ؟ مين اللي حفظ البيت ما يقعش علينا ؟ مين اللي حفظ الكهربا ما تضربش ؟ مين اللي حفظ الانبوبة ما تولعش ؟ ... يتمجد اسمك يا رب

" أمّا إحساني فلا يَزولُ عنكِ "

في سؤال مهم هنا .. طب افرض يا رب حد من عيالك اتعوج شويه احسانك هيفضل قاعد ولا هيزول ؟

الرد نلقاه في صمويل تاني7 لما الرب وعد داود بالبركة والاحسان ليه ولولده سليمان من بعده .. قاله ايه

" وأنا أُثَبِّتُ كُرسيَّ مَملكَتِهِ إلَى الأبدِ. 14أنا أكونُ لهُ أبًا وهو يكونُ ليَ ابنًا. إنْ تعَوَّجَ أؤَدِّبهُ بقَضيبِ الناسِ وبضَرَباتِ بَني آدَمَ. 15ولكن رَحمَتي لا تُنزَعُ مِنهُ " (2صم7: 13)

يعني ان اتعوجينا شوية برضوا احسان الرب لا يزول ... يعرف يؤدبنا بطرق تاني لكن احسانه لا يزول

طبعا احنا كبشر مش ممكن نوصل المستوي ده ... لان لو بكل سهولة ممكن الاب يمنع المصروف عن ابنه لو خالفه وما سمعمش كلامه .. لكن الرب عمره ما استغل حاجاتنا المادية عشان يضغط علينا نسمع كلامه

بل بالعكس بيقول يا ابني اعطني قلبك , والباقي ده علي البيعة هجيبلك شغل وهتاخد شقة وانتي هجبلك عريس عمرك ما حلمتي بيه ودهب ولبس وفسح بس اديني قلبك يا بنتي واصبري شوية .. اطلبي ملكوت الله وبره والباقي يزاد , الرب لا يمكن ان يكون كماكينة فيزا ندخل لها الصلوات وننتظر الاموال ..

اما احساني فلا يزول عنك وعهد سلامي لا يتزعزع قال راحمك الرب :

ايه حكاية عهد سلامك ده يا رب ؟ قالك .. ده عقد بعمله مع عيالي

يتعهد الطرف الاول (المؤمن) بان يسلم حياته للرب تسليما كاملا

الطرف التاني الرب : يتعهد باعطاء الطرف الاول سلام لا يتزعزع ابدا مهما حصل

+ ومن الناس اللي خدت عهد سلام الرب .. معلمنا بطرس بنقرا عنه في (اع12: 7) كان مسجون ومربوط بسلاسل ومستني تاني يوم يتعدم و(16) عسكري بيحرسوه ... رغم كده رايح في سابع نومة لدرجة ان الملاك ضرب جنبه عشان يصحيه ..!!!

ايه يا عم بطرس انت مش حاسس بالدنيا حواليك ولا ايه ؟ يقولك : لأ ما انا واخد عهد سلام يخليني مخافش ابدا

+ معلمنا بولس برضوا كان واخد عهد سلام : كان بيقول لاهل فيليبي

" 4اِفرَحوا في الرَّبِّ كُلَّ حينٍ، وأقولُ أيضًا: افرَحوا.  " (في4: 4)

الله عليك يا معلمنا بولس شكلك مبسوط .. انت قاعد في فرح ولا ايه ؟ يقولنا : لأ انا قاعد في السجن ومقيد بالسلاسل

نقوله ازاي انت مش مضايق ولا تعبان ؟ يقولنا اصلي انا معايا عهد سلام الرب مهما حصل مش هيهمني...

وعَهدُ سلامي لا يتزَعزَعُ، قالَ راحِمُكِ الرَّبُّ.

برضو سؤال مهم تاني : احنا بشر .. ومعرضين نغلط .. افرض غلطنا في حياتنا مع الرب هل الرب يقطع عهد سلامه من اول غلطة ويكربل حياتنا ؟

اللي يجاوب لنا السؤال ده معلمنا بولس في رسالته التانية لتلميذه تيموثاوس 2: 13 قاله ان الرب مش ممكن يخلف عهده ابدا :

" 13إنْ كُنّا غَيرَ أُمَناءَ فهو يَبقَى أمينًا، لن يَقدِرَ أنْ يُنكِرَ نَفسَهُ  " (2تي2: 13) ونشوف الكلام ده مع ابونا ابراهيم

+ ابونا ابراهيم كان واخد عهد سلام من الرب .. لكن لما راح ارض جرار في فلسطين خاف من الملك ابيمالك وكدب عليه وما قلوش ان سارة مراته قاله دي اختي .. قوم الملك ابيمالك بعت وخد سارة

الرب يعمل ايه معاه ؟ يسيبه عشان كدب ؟ طبعا لأ .. ده واخد عهد سلام من الرب .. بس خاف وكدب يا رب وزعلك يقول معلش ... انا هفضل امين ... ايه اللي مخوفك يا ابراهيم يا ولدي الملك ابيمالك .. طب انا هخليه يترعب منك

.. يقول الكتاب في  (تك20: 3) ان الرب بنفسه ظهر لابيمالك في حلم الليل .. الرب بنفسه مش بعت له ملاك ولا رئيس ملايكة وكلمه كلام صعب قاله :

"ها أنتَ مَيِّتٌ مِنْ أجلِ المَرأةِ التي أخَذتَها، فإنَّها مُتَزَوِّجَةٌ ببَعلٍ " (تك20: 3)

قوم صحي ابيمالك بدري وحكي الحكاية لعساكره وقعدوا كلهم يتنفضوا من ابونا ابراهيم ويعت له ورجع له ساره واداه عطايا كتير

++ واحنا النهارده كام واحد واخد عهد سلام من الرب وسطينا ؟

كام واحد المشاكل مش بتحطمه ؟ كام واحدة في الضيقة صابرة وباصصة لفوق ؟ كام واحد اتأخر عليه الرب وهو فرحان وعارف ان الرب مش ممكن هيسيبه ؟

+ صدقوني كل اللي بصوا ليسوع ما كسفهمش  يقول المرنم في مزمور 34
(نظروا إليه واستناروا، ووجوههم لم تخجل) (مز34)

أيَّتُها الذَّليلَةُ المُضطَرِبَةُ غَيرُ المُتَعَزِّيَةِ :

ربنا بيخاطب الكنيسة اللي عيالها بعدوا وتاهوا في سكك الخطية بيقولها ايتها الذليلة

طب ليه الذليلة ؟

عشان عيالها بعدوا عن الرب والخطية داست عليهم .. والشيطان سيد قاسي مش بيرحم عبيده .. بعد ما يقعوا ويسجدوا له يدوس عليهم برجليه فاكرين ادوني بازق في (قض1) كان يعمل ايه في الملوك اللي يغلبهم؟ .. كان يقطع اباهم ايديهم وارجلهم ويقعدهم تحت مائدته يرمي لهم الاكل من فوق .. النهارده بنسمع عن شباب مسيحي بالاسم بيعملوا حاجات تكسف .. اللي بيشرب مخدرات واللي بياخد برشام واللي اتمسك في شقة واللي اتجوزت زميلها عرفي واللي راحت للدكتور الفلاني تعمل مش عارف ايه ... حاجات كتير تحزن .. كمان بنسمع في اوربا عن كهنة واساقفة شواذ .. والقصة دي ابتدتها الكنيسة الانجليكانية في انجلترا وهي ومن اقدم الكنائس .. قال ايه حقوق الانسان كل واحد حر في حياته الخاصة ... طب لما الكاهن والاسقف يبقوا منحرفين الشعب هيعمل ايه يا بوي ؟؟؟

عشان كده الكنيسة ذليلة في كثير من انحاء العالم ..لان الخطية تذل التخين ... ما ذلتش ملوك 

+ منسي :

ملك ود ملك  بنقرا عنه في (2أخ33: 11) قعد اكتر من اربعين سنة في الخطية لحد ما الرب بعت له جنود ملك اشور خزموه من مناخيره وسلسلوه وكروه زي الحيوان

+ ونبوخذنصر :

مهو كان من اعظم الملوك لكن خطية الكبرياء ذلته وربنا خلاه زي الحيوانات سبع سنين ياكل من حشيش الارض

في (دا4: 29)

واحد تالت ذلته الخطية ومسحت بيه الارض هو :

+ شمشون الجبار :

نذير الرب .. ايوه .. يموت الف بفك حمار .. ايوه ... الناس تخاف من اسمه .. ايوه

لكن بعد ما وقع في الخطية بقي تور بيجر الطاحونة ... ذل ولا مش ذل

+ الكنيسة اللي بيكلمها رب المجد ذليلة لان ولادها الخطية ذلتهم وهو عارف كده وشفقان عليهم وعايزهم يرجعوا له

أيَّتُها الذَّليلَةُ المُضطَرِبَةُ :

مش ذل بس لكن ذل واضطراب .. ليه ؟ لان الاضطراب هو احد عقوبات الخطية .. زي ما الوحي المقدس بيقول في سفر التثنية28: 20  

"20يُرسِلُ الرَّبُّ علَيكَ اللَّعنَ والِاضطِرابَ والزَّجرَ في كُلِّ ما تمتَدُّ إليهِ يَدُكَ لتعمَلهُ،" (تث28: 20)

ولما الرب يجيب للخاطي الاضطراب نلاقيه زي المشتوت .. وكل حاجة يعملها تخرب .. مش مركز

كل يوم يتخذ قرار وتاني يوم يرجع فيه... اضطراب ..

غير الانسان اللي مع ربنا نلاقاه هادي وراسي وكل ما يصنعه ينجح فيه ...

أيَّتُها الذَّليلَةُ المُضطَرِبَةُ غَيرُ المُتَعَزِّيَةِ :

النفس اللي في خطية منين تجيها التعزية يا خوي ؟ دي الخطية طرحت كثيرين جرحي وعمرها ما ريحت حد والانسان مهما اتسلي بحاجات العالم عمره ما هيتعزي .. يعني لو واحد خاطي مثلا شاف مسرحية ممكن تديله شوية ضحك لكن بعد كده تلقاه حزين .. العالم ممكن يدي الخاطي فرح خارجي ولذة وقتية لكن عمره ما يقدر يديه تعزية .. لذلك نلاقي اغنياء العالم لو كانوا من الخطاة بيكونوا تعساء .. ليه ؟ عشان معندهمش الروح القدس اللي بيعزي

واحد من المشاهير : ارنست همنجواي (1899) :

الكاتب الامريكي المعروف واللي حصل علي نوبل في الادب عن روايته (العجوز والبحر) وكانت رواياته تمجد القوة النفسية للانسان وكيف ينتصر علي الطبيعة وظروف الحياة ... نلقاه مات منتحر

لان فلسفات العالم كله لا يمكن ان تعطي عزاء للنفس لكنه وحده الروح القدس هو الذي يعزينا.

هأنذا أبني بالأُثمُدِ حِجارَتَكِ :

احنا عارفين ان الناس لما تبني بتبني بالاسمنت عشان يمسك الحجارة مع بعض .. لكن الرب عنده اسمنت خاص هيمسك الحجارة مع بعض وهو الاثمد

ايه هو الاثمد :
هو حجر الكحل لونه رصاصي ضارب للحمرة ويوجد في اصفهان في ايران وفي المغرب وهو حجر نادر ويوجد في صورة ثالث سلفيد الانتيمون او خامس سلفيد الانتيمون وهو اكثر حمرة

وحجر الاثمد ده له فوائد طبية عديدة :

اول ما يصحنوه ويعملوا منه الكحل ويتكحلوا بيه .يشفي العين ويخليها تفتح عشان بيقضي علي كل الجراثيم

ويشفي الجروح اللي بتنزف يخليها تقف عن النزيف كمان بيشفي الحروق والقروح المنتنة اللي في الانسان

والاثمد اللي هو اسمنت الرب اللي هيمسك الحجارة في بعضها يرمز هنا للروح القدس

اللي بيجمع المؤمنين ويمسكهم مع بعض ويخليهم اخوة في العالم كله

v    وهوالذي ينير عيون المؤمنين بقراءة الوصايا المقدسة والتامل فيها زي ما قال القديس الأب غريغوريوس (الكبير( 

v    وهو الذي يشفي جميع جراحات المؤمنين ويوقف نزيف الدم

v    وهو الذي يشفي جميع حروق المؤمنين ويبرد قلبهم

v    وهو الذي يشفي جميع قروح الخطايا اللي عملت التهابات وانتنت وبقت عادات مش قادرين نسيبها    

طب ايه هي حجارة المدينة  دي يا رب ؟ ... الحجارة هي المؤمنين واللي شرحها لنا معلمنا بطرس

في رسالته الاولي (2: 5) " 5كونوا أنتُمْ أيضًا مَبنيِّينَ -كَحِجارَةٍ حَيَّةٍ- بَيتًا روحيًّا   " (1بط2: 5)

هانذا ابني بالاثمد حجارتك وبعدين ....

وبالياقوتِ الأزرَقِ أؤَسِّسُكِ :

ولما الرب يؤسس المدينة بالياقوت Al2 O3  يبقي الاساس صلب :

لان العلماء اكتشفوا ان الياقوت اصلد تاني مادة بعد الالماس (مقياس موهز للصلادة يحتل الياقوت رقم 9 والاماس رقم 10) ومدينة المؤمنين لازم يكون اساسها صلب طب ليه الياقوت الازرق بالذات ؟ لان الازرق لون السماء كده يبقي الاساس صلب وسماوي .... طب ليه يا رب هتخلي الاساس صلب وسماوي ؟؟؟

عشان لما تيجي الاضطهادات والضيقات ما نخافش ... عشان لما نشوف الناس بتهددنا ما نخافش ولما نشوف الشر حوالينا من كل جهة ما نركعش... ولما نشوف الناس بيتعذب والعربيات بتدوس عليها ما نتهزش لما نشوف الناس بتقطع رقابها بالسكين بطريقة وحشية ما نخافش 

+ يا دانيال الاسود هتقطعك .. يقولك ولا اخاف انا متاسس بالياقوت الازرق  يا فتية النار هتشويكم .. ولا نتهز

+ يا يوسف المرة هتمنجهك .. دي مرة وزير الداخلية و انت غلبان والدنيا ضيقة معاك . ابدا ما تقطعوا رقبتي

 + يا سورس يا انطوكيون يا مشهوري ... الفلاحين التلاتة في اسنا - ارجعوا لناسكم يا بوي ... يقولوا ابدا ان تلمت السيوف موتونا بالطواري بتاعتنا ... بالياقوت الازرق أؤسسك

وبالياقوتِ الأزرَقِ أؤَسِّسُكِ، 12وأجعَلُ شُرَفَكِ ياقوتًا :

الشرف هي الشبابيك وفي نوع من الياقوت شفاف.. الياقوت الذي يحتوي على نسبة ~0.01% من التيتانيوم يكون عديم اللون يعني شفاف وفي المدينة الجديدة كل واحد مننا هيكون زي البيت والبيت ده له خمس شبابيك هي الحواس الخمسة ( النظر والسمع والشم والتذوق واللمس ) والرب عايز الشبابيك دي تكون نقية (اجعل شرفك ياقوتا) يعني :-

نتعامل مع العالم بنقاء  :

عيوننا تكون نقية لا تنظر الشر ولا تنظر بحسد ... وداننا تكون نقية لا تتلوث بكلام العالم البذئ ولا تحب سمع النميمة علي الاخرين ولا تحب سماع المديح ومجده الباطل كمان ما نسيبش وداننا للموبايل طول الليل واحنا نحكي لان الكلام بيجر بعضه وبيوصل لمراحل مش كويسة وساعات الشيطان بيسرقنا حبة حبة ياخد الاول وداننا ومنها يخرب كل حياتنا  .. وانوفنا تكون طاهرة ولا تشتهي الطعام الفاخر .. لساننا يكون نقي يتذوق كلام الله ويلهج بالتسبيح مش يمتد ليتذوق الشر ويتلذذ بطعم الاثم والفجور .. ايدينا تكون طاهرة ما تلمس شئ حرام .. مش نحط ايدينا علي بعض ونقول اصلنا مخطوبين في حاجات الشيطان بيسهلها في الاول وبعد كده تاخدنا لسكك وحشة واللمسة البريئة دي ممكن تاخدنا لحضن اخوي وبوسة بريئة وربنا يستر ... لما الرب عايز يعمل الشرف ياقوت يبقي قصده النقاوة اللي بدونها لن يقدر احد ان يعاين الله " ⁸طوبَى للأنقياءِ القَلبِ، لأنَّهُمْ يُعايِنونَ اللهَ." (مت5: 8) .

كمان لما تبقي شرفك ياقوتا مش هتتاثر بالحاجات الوحشة اللي في العالم :

لان الياقوت معروف انه عنصر خامل كيميائيا .. يعني ايه ؟ يعني لا يتفاعل مع العناصر الاخري ... يبقي المؤمن قاعد شايف حاجة وحشة يحول وشه كانه مش شايف ولا له دعوي بفلان ولا علان شبابيك ياقوت لا تتفاعل مع العالم .. القديس مقاريوس الكبير .. لما الرهبان اشتكوا من راهب ان عنده وحده وحشة ودخل اليه القديس مقاريوس الكبير قعد علي الماجور وكانت الست مستخبية تحت الماجور .. طب يا بوي عينك مش شايفة المرة عند الراهب يقولك عيني ياقوت ما تشوفش الشر وتعذر اخوي .. قلبك مش حاسس بالمرة تحت الماجور ؟ يقولك قلبي برضو ياقوت مش هكسفها يمكن يكون لها رجاء وتتوب .. واحنا مطالبين اننا ما نتفاعلش مع العالم لان العالم وضع في الشرير .. واحنا ولاد ربنا مطلوب مننا نكون انقياء .. وزي ما عاش لوط البار في سدوم وعمورة رافضا كل شرهم لازم نرفض كل شر العالم لكن نصيحتي للاخوات اوعي تخرجي عشان تشوفي بنات العالم زي ما عملت دينا في (تك34) لا شكلك من شكلهم ولا قلبك زي قلبهم .. هتتعبي وتندمي والحاجات اللي بيعملوها ما تناسبناش كالبنات للرب ..  ربنا يدينا عيون ياقوت وقلب ياقوت ..

وأجعَلُ شُرَفَكِ ياقوتًا، وأبوابَكِ حِجارَةً بَهرَمانيَّةً :

وأبوابَكِ حِجارَةً بَهرَمانيَّةً :

البهرمان هو الياقوت الاحمر لونه كده زي لون حب الرمان نتيجة اتحاد الياقوت ( الكوراندوم) مع اكسيد الكروم بنسبة  2%  ايه هي ابواب المؤمن اللي الرب هيخليها حجارة بهرمانية ؟ الباب هو مكان الدخول وابواب المؤمن هي المداخل اللي بتدخل الحاجات منها للمؤمن .... وهي الفكر والقلب .. لازم فكرنا يكون نقي وقلبنا يكون نقي وما يسمحش بدخول افكار العالم ولا نجاساته وحرب الفكر هي اول باب يدخل منه الشيطان

عارفين ليه ربنا هيخلي ابوابنا لونها احمر ؟ عشان تبقي مختومة بالدم ومش اي حد يطلع ويدخل  ولما تكون الابواب مختومة بالدم ما يقدرش المهلك يخش ويهلك ... يخاف اول ما يقرب من الابواب . 

ولما الرب يخلي ابوابنا حجارة بهرمانية تبقي ابواب قوية :

مش واحد يقولي خد البرشامة دي عشان تسهر في الشغل اقوله لأ .. يعني لأ .. يقولي نروح مشوار يغضب ربنا اقوله مش ممكن ابدا ابوابك حجارة بهرمانية واحد يقولي هديك فيديو علي موبيلك كل الناس محملاه وشافتوا اقوله لأ انا مش زي كل الناس ابوابك حجارة بهرمانية ....

وأجعَلُ شُرَفَكِ ياقوتًا، وأبوابَكِ حِجارَةً بَهرَمانيَّةً، وكُلَّ تُخومِكِ حِجارَةً كريمَةً :

وكُلَّ تُخومِكِ حِجارَةً كريمَةً :

التخوم هي الارض القريبة من حدود الدول يعني زي ما نقول مصر مثلا تخومها الغربية قبائل اولاد علي.. بعد كده تيجي تخوم ليبيا بعد كده ليبيا نفسها . 

والرب بعد ما هيعمل المدينة الجديدة ياقوت في ياقوت والاساس ياقوت والمؤمنين حجارة كحل فيها ...

 هيدور علي اللي حواليها من بره هيملاها حجارة كريمة زي الزمرد والالماس والمرجان واللؤلؤ ..يعني ايه الكلام ده ؟ التخوم هي سمعة المؤمن والناس اللي حواليه وشكله من بعيد قدام العالم ..والرب عايز المؤمن سراج علي منارة زي ما قال الكتاب في  (مت5: 15) ... قوم اللي جاي هيشوف نور من بعيد .. المؤمنين لازم يكونوا منورين في العالم  وصدقوني لو جرجس ومرقس ومريم مش منورين .. قول علي الدنيا السلام ..

++ عايزين كل واحد فينا ينقي تخومه يبتعد عن اصدقاء السوء وجلسات الشر والاستهزاء وجلسات النميمة عشان نكون منورين وكل اللي حوالينا منور ... يقول الرب مناديا كنيسته في اش60

"1"قومي استَنيري لأنَّهُ قد جاءَ نورُكِ، ومَجدُ الرَّبِّ أشرَقَ علَيكِ. 2لأنَّهُ ها هي الظُّلمَةُ تُغَطِّي الأرضَ والظَّلامُ الدّامِسُ الأُمَمَ. أمّا علَيكِ فيُشرِقُ الرَّبُّ، ومَجدُهُ علَيكِ يُرَى. 3فتَسيرُ الأُمَمُ في نورِكِ، والمُلوكُ في ضياءِ إشراقِكِ.  " (اش60: 1)

ربنا يدينا نشوف مدينته تحت ونشوف مدينته فوق

وله كل المجد الي الابد امين