الحسد في المسيحية

الحسد

بسم الثالوث الاقدس ليبارك الرب الكلمة بروح القدوس ويجعلها عاملة في قلوبنا وحياتنا

الحسد في بعض دول العالم :

الناس اللي بتؤمن بالحسد مش موجودة في مصر بس : -

+ في اليونان يبصقون علي الارض اذا صادفهم شخص حسود ويحتفظون في ملابسهم بفص ثوم لصد العين

+ في الصين يستعملون المراة السداسية بتعليقها علي المنازل او في المتاجر لصد طاقة عين الحاسد

+ في نيبال يرتدون عين بوذا لصد الحسد

+ في الهند يعلقون اشرطة حمراء علي ذراع ورقبة الطفل لصد الحسد

+ عند قدماء المصريين كانوا يعتقدون في ان اللون الازرق يحمي من الحسد وله طاقة سحرية ويستخدمون عين حورس لصد الحسد وعروسة الورق التي نخرمها بالابرة ونحرقها والتمائم المختلفة للحماية من الحسد

+ ودلوقتي زادت الحاجات دي وبنشوف واحد راكب عربية حديثة موديل السنة ومعلق فيها صندل والناس اللي معلقة ورنة علي البيت او حاطة خمسة وخميسة او خرزة زرقا  او لما يكون في بيت جديد يدبحوا دبيحة ويحطوا يديهم في الدم ويعملوا كفوف علي الحيط والناس اللي بتخلي عيالها وسخة وهدومها وسخة قال ايه عشان ما تتحسدش والبخور والرقي وفي حاجة زمان كان اسمها الخريج يعني يقروا للواحد المحسود قوم يتتوب يبقي الحسد بيطلع منه   

مفهوم الحسد في المسيحية :

لما تقول لحد الحسد مش ممكن يؤذي الانسان .. يقولك ... ازاي بتقول الكلام ده الحسد وارد في الانجيل ؟

الحسد وارد في الانجيل فعلا (30) مرة لكن ايه مفهوم الحسد في المسيحية ؟

الحسد هو تمني زوال النعمة من الاخرين وامتلاكها للحاسد لكن وخلوا بالكم من لكن لا يقدر الحاسد ان يزيل النعمة عن الاخرين انما قد يلجأ الي طرق شريرة لازالة هذه النعمة

زي ما حصل مع اخوة يوسف حسدوه علي ان ابوه بيحبه وجابله قميص ملون لكن ما يقولناش الكتاب ان يوسف جراله حاجة مثلا القميص اتشرك من الحسد ولا يوسف اتسخط ولا اتشل ولا حاجة كل اللي قدروه عليه انهم خططوا له عشان يموتوه ورموه في البير , وزي ما حصل مع هابيل الصديق ان قايين حسده يعني استكتر عليه النعمة اللي هو فيها ومقرنياش في الكتاب ان قايين بص لهابيل حرقه ولا سخطه لكن اتغاظ منه وملأ الشر نفسه وبسماح من الرب مات هابيل الصديق

+ طيب ممكن في حد يسأل لما الحسد ما يضرش ليه بنقول في صلاة الشكر ( نجنا من كل حسد وكل تجربة )؟

بنصلي كده عشان ربنا يحوش المؤامرات والافعال الشريرة اللي بيعملها الحاسد عشان يزيل النعمة عننا لكن الحسد نفسه ما يقدرش يعملنا حاجة خليه يحسد النهار كله ولا حاجة بنعمة ربنا

+ في كمان انواع من الحسد : حسد الناس لبعضها وحسد الشياطين للناس

انواع الحسد :

حسد الناس :

وممكن ياخد كذا شكل زي الحاجات اللي بتبوظ .. او العيال اللي بتتنكد ... او الكحك اللي بيتشوهر او اللي ربنا لسه مدهاش يقولوا لها انتي مشوهرة وتشق السوق وتشق البحر وتشق الجبل .. واللي تتشوهر وتقطع الرضاعة واللي ما يكلش حاجة معينة عشان اتحسد فيها ...

حسد الشياطين :

هو اللي دخل الموت العالم لانه حسد ادم وحوا "لَكِنْ بِحَسَدِ ابْلِيْسَ دَخَلَ الْمَوْتُ الَىَّ الْعَالَمِ‏ " (الحكمة2: 24)

هو نوع من الحسد لابناء الله الحقيقيين المؤمنين باسمه

ويكلمنا الكتاب عن الحسد ده في قصة ايوب .. ايوب كان اغني بني المشرق وعنده بقر وغنم وعبيد وعيال وزرع يعني حياته ( متمنجهة ) بالاضافة لانه كان رجل يتقي الرب

الشيطان حسده ... كل ده عندك يا ايوب ؟ لكن ما كنش قادر يعمله حاجة

وهنا نشوف ان الحاسد حتي لو كانت قدراته جبارة زي الشيطان مش ممكن يمسنا بسوء

ده الشيطان نفسه بيقول انا مش قادر امس ايوب " 10أليس أنَّكَ سيَّجتَ حولهُ وحولَ بَيتِهِ وحولَ كُلِّ ما لهُ مِنْ كُلِّ ناحيَةٍ؟  " (اي1: 10) يعني انت يا رب محوطه بسور مش قادر اقرب منه ....

+ ولما يسيج الرب حولك وحولكي.. الشيطان ما يقدرش يقرب لان سور الرب حوالينا مش بس ما يقربش منك ده حتي لو عندك كلب لا مؤاخزة بيحرس البيت الشيطان ما يقدرش يقرب عليه .. حواليك سياج من الرب

+ والمؤمنين بيحسدهم الشيطان ..يعني مثلا يوم تروحوا فيه الكنيسة تلاقوا البيت مليان عكننة بدون سبب ليه ؟ مشاكل من الهوا بيخترعها الشيطان عشان يملي البيت عكننة .. او طالعين تحضروا الكلمة تلاقوا ميت حاجة تعطلكم او الراجل بيقولك قبل ما تروحي تحضري الكلمة اعملي لينا اكل .. اعملي لي كباية شاي ... وغيره وغيره .. حسد من الشيطان

+ صدقوني الشيطان مش بيستكتر علي الانسان الخيرات المادية بس يعني رزق جاله  او  حاجة جديدة اشتراها لكنه بيستكتر عليه ساعة رضا قاعدها مع عياله واسرته ... حسد شديد ربنا يحفظنا منه ويسيج حولينا

هل الحسد مرتبط بنوع معين من البشر ؟ :

الاجابة : لأ ... يعني الحاسد ممكن يكون راجل او ست.. صغير او كبير ... غني او فقير

في ناس تقولك ( ده غني ما يحسدش ) او (فلانة من بيت مستريح ما تحسدش) غلط لان الحسد خطية والخطية كل الناس معرضة لها

+ بدري كان في ملك اسم (اخاب ) ملك يعني الدنيا مستريحة معاه وكان ملك غني والامور تمام

ونصره الرب علي ( بنهدد ملك ارام ) مرتين رغم ان جيشه كان صغير جدا

+ انتو عارفين العاج غالي جدا ولو واحد معاه عصاية يدها عاج يبقي تمنها الشئ الفلاني واخاب كان غني لدرجة انه عمل بيت كامل من العاج تصدقوا بيت كامل من العاج ...

+ جنب قصر اخاب كان في واحد غلبان ليه جنينة اسمه ( نابوت اليزرعيلي ) قوم اخاب حسد نابوت علي جنينته وقاله تديني  الجنينة دي واديك مكانها احسن منها او  اديك تمنها زي ما تحب لكن نابوت رفض يقول الكتاب " 4فدَخَلَ أخآبُ بَيتَهُ مُكتَئبًا مَغمومًا مِنْ أجلِ الكلامِ الذي كلَّمَهُ بهِ نابوتُ اليَزرَعيليُّ قائلاً:"لا أُعطيكَ ميراثَ آبائي. واضطَجَعَ علَى سريرِهِ وحَوَّلَ وجهَهُ (يعني لوي بوزه ) ولم يأكُلْ خُبزًا.(يعني قطع الزاد) " (1مل21: 4)

+ طب اخاب ده فقير ولا محتاج يا ولاد لكن اللي حصل.. الطمع والحسد .. عشان كده محدش يقول ان الغني مش بيحسد .. اهو ملك والدنيا مستريحة معاه وبيحسد .

هل الكتاب قال عن  الحسد انه خطية ؟ :

لازم الاول نفرق بين الحسد والغيرة :

الغيرة :

مختلفة عن الحسد لانها تعني ان الانسان يبص للحاجة يتمني ربنا يديه زيها وخلاص ولا يتمني انها تزول من صاحبها ولا حاجة

يعني مثلا لوقلت ( الموبيل ده حلو يا رب يكون معايا واحد زيه ) دي غيرة

لكن لو قلت ( هي مالها بالموبيل ده  .. دا انا اللي محتاجه .. يعني هي بتعمل ايه بيه تلقاها مش عارفة تشغله ) ده يبقي حسد

والغيرة ان كانت في حاجة كويسة مش حرام او كانت في سلوك روحي او فضيلة مش حرام  والرسول بيقول :

" 18حَسَنَةٌ هي الغَيرَةُ في الحُسنَى كُلَّ حينٍ " (غل4: 18)

اما الحسد

فهو خطية يقول الرسول بولس : "21حَسَدٌ، قَتلٌ، سُكرٌ، بَطَرٌ، وأمثالُ هذِهِ التي أسبِقُ فأقولُ لكُمْ عنها كما سبَقتُ فقُلتُ أيضًا: إنَّ الذينَ يَفعَلونَ مِثلَ هذِهِ لا يَرِثونَ ملكوتَ اللهِ. " (غل5: 21)

ويقول ايضا :

" 12قد تناهَى اللَّيلُ وتقارَبَ النَّهارُ، فلنَخلَعْ أعمالَ الظُّلمَةِ ونَلبَسْ أسلِحَةَ النّورِ. 13لنَسلُكْ بلياقَةٍ كما في النَّهارِ: لا بالبَطَرِ والسُّكرِ، لا بالمَضاجعِ والعَهَرِ، لا بالخِصامِ والحَسَدِ. 14بل البَسوا الرَّبَّ يَسوعَ المَسيحَ، ولا تصنَعوا تدبيرًا للجَسَدِ لأجلِ الشَّهَواتِ. " (رو13: 12)

ولما نبص لخطية الحسد نلقاها من الخطايا المركبة يعني ايه ؟ يعني لو شفناها نلاقيها مكونة من مجموعة من الخطايا

اولا : الحسد كسر للوصية العاشرة :

الوصية العاشرة بتقول " 21ولا تشتَهِ امرأةَ قريبِكَ، ولا تشتَهِ بَيتَ قريبِكَ ولا حَقلهُ ولا عَبدَهُ ولا أَمَتَهُ ولا ثَوْرَهُ ولا حِمارَهُ ولا كُلَّ ما لقريبِكَ. "(تث5: 21)

v واللي بيحسد بيشتهي الحاجة اللي في يد الناس ويتمني تكون ملكه زي ما بنقول قلبه بياكله وتبقي نار مولعة في قلبه من النعمة اللي شايفها عند الناس

v والوصية دي بتكشف عن عمق وصايا الكتاب المقدس لانها بتدور علي الخطية من جذورها وتقلعها لان الشهوة بداية الخطية

v اخوات يوسف : قالوا جبله ابوه قميص واحنا ليه ماجبلناش ؟ يوسف بيحلم احلام حلوة واحنا ليه ما بنحلمش زي كده ؟ ابوه بيحبه واحنا ليه مش بيحبنا زيه ؟ اشتهوا النعم اللي اداها ربنا ليوسف

v قايين : قال في نفسه يا ريتني كنت زي هابيل وربنا قبل ذبيحتي هو احسن مني في ايه ؟ اشتهي ان ياخذ نعمة قبول الذبيحة التي اخذها هابيل الصديق

v مشكلة لما نبص للي في يد الناس ونشتهيه هنتعب خالص

v ان اقتنينا فضيلة القناعة هنهدم شهوة الامتلاك مهما كان اللي معانا قليل  

ثانيا : الحسد ضد المحبة :

لان الحاسد لو كان عنده محبة لاخوه او لجميع الناس زي ما بيوصينا الكتاب ماكنش حسده

"4المَحَبَّةُ تتأنَّى وترفُقُ. المَحَبَّةُ لا تحسِدُ. المَحَبَّةُ لا تتفاخَرُ، ولا تنتَفِخُ، 5ولا تُقَبِّحُ، ولا تطلُبُ ما لنَفسِها، ولا تحتَدُّ، ولا تظُنُّ السّؤَ، 6ولا تفرَحُ بالإثمِ بل تفرَحُ بالحَقِّ، 7وتَحتَمِلُ كُلَّ شَيءٍ، وتُصَدِّقُ كُلَّ شَيءٍ، وترجو كُلَّ شَيءٍ، وتصبِرُ علَى كُلِّ شَيءٍ. 8المَحَبَّةُ لا تسقُطُ أبدًا." (1كو13: 4)

اخوة يوسف :

لو كان عندهم محبة ماكانوش حسدوه علي انه حبيب ابوه او ابوه جابله قميص ملون او الاحلام اللي كان بيحلمها كانوا قالوا اخونا لحمنا ودمنا واللي عنده كأنه عندنا... مهي المحبة ( لا تطلب ما لنفسها ) لكن عشان مفيش محبة حسدوه ورموه في البير وحاولوا يموتوه.

قايين :

لو كان عنده محبة مكانش حسد اخوه لان ( المحبة لا تحسد) ولوكان عنده محبة ماكنش اتضايق من اخوه لان ( المحبة لا تحتد ) ولو كان عنده محبة ماكنش فكر يموت اخوه لان ( المحبة لا تفرح بالاثم )

ثالثا : الحسد ضد الشكر :

ما هو الحاسد لو بص للنعم اللي ربنا اداهالوا وشكره عليها مش هيحسد حد ومش هيشتهي النعمة اللي معا حد

الرزق ضيق شويه :
معلش اشكر ربنا .. الحمد لله ربنا ساترني وساتر عيالي ده اللي بيعي بياخد برشامة ريفو يخف وغيري متشندل وتعبان ابص للنعمة اللي عندي واشكر

عليا التزامات ومش موفيها :

معلش اشكر ربنا وربنا هيمد يده ويساعدني اسد وكمان يديني زيادة

مش لابسة هدوم غالية و دهبك قليل :

اشكر ربنا واشكري ربنا الحمد لله قاعدين في بيت يسترنا غيرنا تعبان وفي ناس زي ما بيقولوا (حالتها تصعب علي الكافر ) اللي نايم علي الرصيف واللي نايم تحت الكوبري ...

صدقوني اللي عنده روح الشكر عمره ما يحسد حد ولا يفكر يحسد حد

وبقول اللي عنده روح الشكر يعني الشكر في قلبه ومشاعره وايمانه مش اللي بيشكر ربنا ببقه

يحكي لنا بستان الرهبان :

( ان في راهب كان في غابة في الشتا والدنيا برد وهو ماشي لقي واحد نايم بهدوم مقطعة ومتكرفس زي الواو مع البرد راح بص عليه لقيه قام من النوم قال الراهب لما اشوفه هيعمل ايه راح الراجل الغلبان ده لا مؤاخذة اتبول .. وبعد ما اتبول قال : اشكرك يا رب ناس كتير في السجون دلوقتي مش قادرة تتبول وناس كتير مريضة والمرض منعها من البول وناس كتير مقيدة يديها ورجليها ومش قادرة تقوم زي كده وتتبول – ورجع الراجل نام يقول البستان : فاضاء كالشمس )

تفتكروا واحد زي  ده ممكن يحسد ؟

رابعا : الحسد ممكن يجي من الكبرياء :

لان الشخص المتكبر ميحبش ان غيره يكون احسن منه لكن يحب ان التميز يكون ليه هوه كمان المتكبر ما يحملش ان حد يتمدح غيره وده نوع من الحسد مستكتر المدح علي الاخرين ومستكتر التميز علي الاخرين وممكن الحسد ده يكون حتي في الخدمة يوم ما الخادم يدور انه يكون احسن من فلان او علان ويحسدهم ويبتدي يدور علي المدح لنفسه بس ,  تبتدي كبرياء الذات تدخل الخدمة .. واول ما كبرياء الذات تدخل الخدمة روح الله يفارقها .... تلاقي الخادم صوته جميل اله ... والعظة اللي بيقولها مليانة شروح ومعلومات شديدة لكن تسمعها من هنا تطلع من هنا .. ليه ؟ لان روح الرب فارق الكلمة خلاص بقيت مش ممسوحة بروح الله القدوس ... لان الخادم بيدور علي مجد نفسه ومجد اسمه وبيحسد الاخرين عايز يوعظ احسن منهم وهما تبقي عظاتهم ضعيفة..  مش بيدورعلي  مجد اسم الله .

+ ايام بولس الرسول كان في ناس يهود دخلوا للايمان المسيحي لكن كان عندهم مشكلة انهم لسه عايزين يتمسكوا بطقوس الناموس وبولس يفهم فيهم ويشرح لهم لكن مفيش فايدة بل كانوا مضايقين من بولس وبيحسدوه علي كرازته ... بيحسدوه ؟؟؟ ايوه بيحسدوه لان كرازته ناجحة ولما دخل بولس السجن زادت كرازتهم يوعظوا الناس ويبشروهم بالمسيح لكن بدافع الحسد لبولس وعشان يبقوا احسن منه مش لمجد لمجد اسم الرب لكن لمجد انفسهم وقال عنهم
"15أمّا قَوْمٌ فعَنْ حَسَدٍ وخِصامٍ يَكرِزونَ بالمَسيحِ، " (في1: 15)

يعني حتي الكرازة ممكن يكون فيها حسد ؟ ايوه

+ لكن الخادم الحقيقي الذي يخدم لاجل اسم الرب معندوش كبرياء ..يبقي عايز كل الخدام حلوين وعايز العمل يكبر وينمو ويثمر الكل بيشتغل في حقل الرب واحد بيحرت وواحد بيزرع وواحد بيسقي لكن الحقل للرب وهو اللي ينمي الزرع ويباركه بروحه القدوس

خامسا : الحسد ممكن يجي من خطية اللت والعجن :

ايه ده هو ( اللت والعجن في الكلام خطية )؟

 ايوه خطية "مُباحَثاتٍ ومُماحَكاتِ الكلامِ، التي مِنها يَحصُلُ الحَسَدُ والخِصامُ والِافتِراءُ والظُّنونُ الرَّديَّةُ، "(1تي6: 4)

تقعدي تحكي عن فلانة وعلانة ( اه وراحت فين وجات منين وليه وكيف وجابت ايه ؟) وتفضلي تلتي وتعجني في الكلام وحاجات ما تخصكيش اساسا لحد ما توصلي لفكر الحسد وتقولي ( ياختي معاها كتير ولا حد زيها جوزها عنده وعنده وعيالها جابوا وجابوا ....دا انا لو عندي نص اللي عندها كنت ...) يبقي اللت والعجن وصلنا للحسد واشتهاء ما عند الاخرين .

لكن ان تبعنا كلمة الرب  هنبعد عن اللت والعجن ...

شفنا ان الحسد خطية مكونة من عدة خطايا جواها ومش بس الحاسد اللي بيعمل خطية كمان الانسان لما يتحسد والحسد يؤثر فيه خطية عليه ... كيف الكلام ده ؟ وطب لما حد يحسدني وينكد علي او يبوظ لي حاجة انا ايه ذنبي ؟

خطية المحسود :

الانسان لما يحوق فيه الحسد يبقي خطية عليه عارفين ليه ؟ لان ده يدل علي ان ايمانه قليل ولما يكون ايمانه قليل هيجيبله تلات مشاكل : -   

1) لما يكون الانسان ايمانه قليل هيخاف :

لان لو ايمانك في الله انه فوق كل شئ واقوي من اي شئ عمر ما شئ هياثر عليك وعمرك ما هتخاف

" لا تخَفْ لأنِّي فدَيتُكَ. دَعَوْتُكَ باسمِكَ. أنتَ لي. 2إذا اجتَزتَ في المياهِ فأنا معكَ، وفي الأنهارِ فلا تغمُرُكَ. إذا مَشَيتَ في النّارِ فلا تُلذَعُ، واللَّهيبُ لا يُحرِقُكَ. 3لأنِّي أنا الرَّبُّ إلَهُكَ " (اش43: 1)

ولما يخاف هيحط في قلبه ان الحاسد ممكن يؤذيه وساعاتها يسمح ربنا انه يتأذي لانه خاف وادي الانسان اللي قدامه سلطان عليه بدل ما يدي السلطان للرب افتكر ان اللي قدامه ممكن يؤذيه واللي قدامه انسان زيه تراب ممكن نفسه يطلع ما يدخلش تاني "4تخرُجُ روحُهُ فيَعودُ إلَى تُرابِهِ. في ذلكَ اليومِ نَفسِهِ تهلِكُ أفكارُهُ " (مز146)

2) لما يكون الانسان ايمانه قليل هيشك في قدرة ربنا :

معلمنا بطرس الرسول مقدرش يمشي علي الميه وكان هيغرق :

لما كان التلاميذ في السفينة والريح شديدة والامواج عالية .. جه السيد المسيح ماشي علي وش الميه وبص معلمنا بطرس وقاله ان كنت انت المسيح فامرني امشي علي الميه واجيلك قالوا : تعال راح معلمنا بطرس نزل من السفينة ومشي شوية علي الميه ويقول الكتاب في متي :

" ³⁰ولكن لَمّا رأَى الرِّيحَ شَديدَةً خافَ. وإذ ابتَدأَ يَغرَقُ، صَرَخَ قائلاً:"يارَبُّ، نَجِّني!". ³¹ففي الحالِ مَدَّ يَسوعُ يَدَهُ وأمسَكَ بهِ وقالَ لهُ:"ياقَليلَ الإيمانِ، لماذا شَكَكتَ؟" (مت14: 27)

+ معلمنا بطرس كان هيغرق ليه ؟ لان ايمانه قل وشك في قدرة يسوع وبعد ما شك خاف .. الشوية اللي مشاهم علي وش الميه كان فيهم ايمانه قوي لكن لحظة ما ضعف ايمانه وابتدي يفكر بعقله وانه صياد قديم والريح شديدة والامواج عالية ابتدي يغرق لان الشك دخل قلبه  

+ والمؤمن اللي ايمانه بيقل ..الحسد بيحوق فيه لان يشك في حماية الرب ورعايته ويخاف من انسان زيه فيسمح الرب ان الحسد يؤذيه  

+ يقولك معلش خليك بره عشان انت جاي من السوق لحسان دي لسه والدة  تتشوهر ؟ برضوا ده كلام .. هو مين اللي بيحرسها ويحرس عيلها ؟ مش الرب .. دخلت ..طلعت الرب موجود وهو الحارس ليه بتشك في قدرة يسوع؟

3) لما يكون الانسان ايمانه قليل مش هيسلم حياته بالكامل في يد الرب :

لما يكون الانسان ايمانه قليل يشغل عقله مع ايمانه  

+ زي ما حصل مع حنانيا وسفيرة كان الناس بيجيبوا فلوسهم ويحطوها عند اقدام الرسل راح حنانيا وسفيرة باعوا حقل - يعني غيط – وبدل ما يدوا الفلوس كلها للرسل حطوا شوية من الفلوس وقالوا نخلي الباقي معانا الدنيا وحشة

ولما دخل حنانيا سأله بطرس الفلوس كاملة ؟ قاله ايوه راح بطرس قاله ليه ملي الشيطان قلبك وسرقت من الفلوس وكذبت علي الروح القدس ؟ راح وقع ميت .. بعد شوية دخلت مراته سفيرة سالها هل المبلغ كامل ؟ قالت ايوه قالها ياللا حصلي جوزك .. وقعت ميتة ..

+ وكان المفروض يدوا كل الفلوس للرسل لانك لو سلمت حياتك للرب ما تسيبش فيها حتة للشيطان صدقني هيؤذيك من الحتة دي لان الرب مش مالكها ... الرب مش موجود فيها

+ حياتنا زي البيت ولازم مفاتيح الاود كلها تكون مع الرب ... لكن لو في اودة مفتاحها مش مع الرب ... يبقي احنا  مخلناش الرب يحرسها ومنلومش الرب لما يدخل منها عدو الخير   

+ يقولك انا ببخر العيل لكن عارف كل شئ باذن ربنا ... طب البخور هتعمله ايه ؟ العيل عايش ببركة ربنا ولا ببركة البخور ؟ ومن اللي بيحافظ عليه ويحرسه ربنا ولا البخور ؟ متقولش ربنا والبخور اما ربنا او  البخور

شوفوا ربنا ميحبش شريك.. متسيبش في نفسك حته للشيطان وتعمل نفسك مؤمن صالح

" لأنَّهُ أيَّةُ خِلطَةٍ للبِرِّ والإثمِ؟ وأيَّةُ شَرِكَةٍ للنّورِ مع الظُّلمَةِ؟ 15وأيُّ اتِّفاقٍ للمَسيحِ مع بَليعالَ؟ " (2كو6: 14)

وطالما في نفوسنا اننا ممكن نتأذي من الحسد يبقي في حتة ضلمة في نفوسنا هيدخل منها الشيطان ويؤذينا

حتي لو قلنا بسم الصليب ... الله يا عدرا ... الله يا مارجرجس ...

+ وبيحصل ان في ناس تقول : دخلت فلانة عينها وحشة ورغم اني قلت ميت بسم الصليب .. لكن الواد قعد الليلة كلها منكد ويبكي وينحر .. مش عارفه ليه ؟

اقولك ليه : لان ايمانك ضعيف وفي قلبك شك ان الانسانة دي ممكن تؤذي ولدك ولا بتك .. اوعي تلومي علي ربنا وتقولي يا رب ما صليت .. ليه حصل كده ...؟

+ بدري نزل شعب الله يحارب الفلسطينيين اتهزموا ومات منهم 4000 نفس قالوا نعمل ايه نعمل ايه ؟ قالوا نجيب تابوت عهد الرب وتابوت عهد الرب كان يمثل السيد الرب في العهد القديم , جابوا التابوت وشالوه علي الاكتاف وطلعوا يحاربوا الفلسطينيين تاني اتهزموا تاني ومات منهم 30000نفس رغم انهم شايلين تابوت عهد الرب الذي يمثل السيد الرب ...!!!

+ طب ليه ؟ عشان كانوا اشرار .. يعملك ايه تابوت عهد الرب وانت حياتك مش ملك الرب بالكامل .. قول مية بسم الصليب وقلبك في حته سوده .. برضه هيخش منها شيطان الحسد ويؤذيك .

الحسد بيؤذي مين ؟ :

شوفوا الانسان طالما ان في ايمانه القلبي ان ما فيش حاجة تقدر تضره الا باذن ربنا

يبقي ما فيش حد ممكن يؤذيه بالحسد .

"لأنَّكَ قُلتَ:"أنتَ يارَبُّ مَلجإي". جَعَلتَ العَليَّ مَسكَنَكَ، 10لا يُلاقيكَ شَرٌّ، ولا تدنو ضَربَةٌ مِنْ خَيمَتِكَ. 11لأنَّهُ يوصي مَلائكَتَهُ بكَ لكَيْ يَحفَظوكَ في كُلِّ طُرُقِكَ. 12علَى الأيدي يَحمِلونَكَ لِئلا تصدِمَ بحَجَرٍ رِجلكَ. 13علَى الأسَدِ والصِّلِّ تطَأُ. الشِّبلَ والثُّعبانَ تدوسُ. 14"لأنَّهُ تعَلَّقَ بي أُنَجِّيهِ. أُرَفِّعُهُ لأنَّهُ عَرَفَ اسمي. 15يَدعوني فأستَجيبُ لهُ، معهُ أنا في الضِّيقِ، أُنقِذُهُ وأُمَجِّدُهُ. 16مِنْ طولِ الأيّامِ أُشبِعُهُ، وأُريهِ خَلاصي" (مز91: 9)

لكن سبتي حتي سوده في حياتك وربطتي الخيط فيه سبع عقد علي يدك لما طلع الهلال وفكتيه لما كمل القمر تبقي مخيرة اوعي تقولي يا رب سلم ... مش حطيتي رجاكي واملك في الخيط عليكي وعلي الخيط قولي له يا خيط سلم ..

+ شوفوا طالما احنا متمسكين بربنا ومالي قلبنا عمر ما في حاجة تؤذينا

+ بدري بعت الملك الشرير بالاق ملك الموابيين لبلعام النبي الشرير عشان شعب الله كان نازل عليه يحاربه بعت له رسل يقوله العن لي الشعب ده.. قوم الرب ظهر لبلعام وقاله اوعي تلعن الشعب لان شعبي مبارك راح الملك بعت له تاني خد بعضه بلعام وراح للملك وبدل ما يلعن الشعب ربنا حط علي لسانه البركة وبارك الشعب اربع مرات لما كان بالاق هيطق منه ...

والحكاية دي تعلمنا انه حتي لو حد قاصد لك شر قادر ربنا يحوله لخير غصبن عنه ...

والمؤمن طالما مفيش في نفسه شئ ملك الشيطان مش ممكن يؤذيه بل ان ربنا بيخزيه

" لكَيْ يُخزَى المُضادُّ، إذ ليس لهُ شَيءٌ رَديءٌ يقولُهُ عنكُمْ. " (تي2: 8)

لكن اللي يؤذيه الحسد هو الحاسد نفسه :

اول حاجة يفقد سلامه الداخلي :

يقول القديس الشهيد – الساحر سابقا – كبريانوس

(إن كان في الحسد معاداة لله ذاته فكيف يمكن أن يسكن في القلب سلاما؟!

مثل هؤلاء لا يهناون بطعام أو يتمتعون بشراب إنهم على الدوام يتأوهون ويتنهدون ويحزنون فطالما لا يطرد الحسد يتمزق قلبه نهاراَ وليلا بلا انقطاع )

وفعلا بنلاقي في الحياة الناس الحسودين تعبانين دايما نار قايدة في قلوبهم وما بيشوفوش الراحة   

تاني حاجة الحاسد بعد خطية الحسد بيقع في خطايا تاني   :

 الحاسد لما بيتمني زوال النعمة وامتلاكها لنفسه ممكن يلجأ لطرق شريرة لتحقيق كده

ممكن الحاسد يؤذي الناس في شغلهم ويضايقهم  

+ زي ما حصل ان الفلسطينيين حسدوا يعقوب لما سكن في جرار وغني .. وطردوه منها راح نزل الوادي برضوا حسدوه وكان كل ما يحفر بير يشاكلوا معاه ويقولوا له دي بتاعتنا ويخادوها والنهارده الناس اللي بيحسدك في اكل عيشك وجيرانك اللي بيضايقك في بيتك واللي بيوقفلك مصلحة واللي بيمنع منك ترقية وياخد مكانك واللي واللي..  هما هما الفلسطينين اللي كانوا بيحسدوا ابونا يعقوب .. لكن ابونا يعقوب كان الرب معاه . هل احنا الرب معانا؟

+ كمان ممكن الحسد يولد خطية حب المال

يبقي الحاسد عايز يغني ويزود ماله مش مهم منين من حلال من حرام مش مهم   

+ والحسد ممكن يوصل لخطية القتل :

زي ما حصل مع اخوة يوسف : فكروا في قتله ورموه في البير

وزي ما حصل مع هابيل الصديق : قتله اخوه قايين

ربنا يحفظنا من مؤامرات الحاسدين ويسيج علينا بسياجه بشفاعة الست العدرا ام النور

ولالهنا المجد الدائم ... امين

ساكبة الطيب

ساكبة الطيب

قصة ساكبة الطيب اتذكرت في البشاير الاربعة متي26 ومرقس14 ولوقا7 ويوحنا12 من القصص اللي استخدمها البعض من اعداء الكتاب للاساءة للكتاب المقدس وقالوا انها مختلفة في رواية كل انجيل عن التاني .. وده يدل علي ان الانجيل محرف

واوجه هذه التناقضات :

	متي	مرقس	لوقا	يوحنا
في المكان	قرية بيت عنيا (في الجنوب قرب اورشليم) – منزل سمعان الابرص		مدينة نايين (في الشمال قريبة من الناصرة) – منزل سمعان الفريسي	بيت عنيا – بيت لعازر ومريم ومرثا
في الزمان	في اواخر خدمة السيد المسيح قبل الفصح بيومين		في بداية خدمة السيد المسيح	في اواخر خدمة السيد المسيح قبل الفصح بستة ايام
في احداث القصة	سكبت الطيب علي راسه		سكبت الطيب علي قدميه	لم تسكب وانما دهنت قدميه
	اغتاظ التلاميذ	اغتاظ قوم من الحاضرين	اغتاظ سمعان الفريسي	اغتاظ يهوذا الاسخريوطي

الرد ببساطة ان القصة ما حصلتش مرة واحدة وده سبب الاختلاف بين الاناجيل

+ كمان مريم اخت لعازر مش هي المرأة الخاطئة التي سكبت الطيب في لو7 للاسباب الاتية :

1- القصة حصلت اكتر من مرة في اماكن مختلفة في حالة المراة الخاطئة في مدينة نايين (في الشمال قرب الناصرة) وفي حالة مريم اخت لعازر في قرية بيت عنيا .

2- قصة المرأة الخاطئة حصلت في بداية تبشير السيد المسيح ولكن قصة مريم اخت لعازر حدثت في نهاية حياته

3- لو كانت القصة واحدة ما كانش معلمنا لوقا بعد ما اشار لقصة المراة الخاطئة في اصحاح7 رجع واشار لقصة مريم في الاصحاح العاشر وانها كانت قاعدة هي ومرثا يخدموا يسوع

4- كمان معلمنا يوحنا فم الذهب في تفسيره قال ان المراة المشار ليها في لوقا7 غير مريم اخت لعازر

من الاسباب دي نفهم ان مريم اخت لعازر غير المراة الخاطئة في لو7

+ بصفة عامة كل المفسرين والشراح للكتاب اتفقوا علي ان اللي سكب الطيب علي السيد المسيح مرأتين هما المراة الخاطئة في بداية تبشير السيد المسيح ومريم اخت لعازر في نهاية تبشيره يبقي المراة الخاطئة الجميع متفق انها سكبت الطيب علي السيد المسيح في بداية تبشيره

لكن المفسرين اختلفوا في مريم اخت لعازر

في بعض المفسرين قال انها سكبت الطيب مرة وفي ناس قالوا انها سكبت الطيب مرتين

المفسرين اللي قالوا مريم سكبت الطيب مرة :

قالوا المرة دي كانت قبل الفصح بستة ايام زي ما قال انجيل يوحنا12 ... وده رأي ضعيف .. ليه ؟

لان في مفسريين تانيين اعترضوا عليهم وقالوا : طب يا اخوانا هتقولوا ايه في انجيل معلمنا متي ومرقس اللي قالوا القصة حصلت قبل يومين من الفصح ...
قالوا : لأ اصلي معلمنا متي ومرقس لما قالوا قبل يومين من الفصح ... كان السيد المسيح بيحكي عن صلبه وموته بعد يومين واستشهد بقصة سكب الطيب اللي حصلت قبل الفصح بستة ايام وانها كانت اشارة لموته وتكفينه

رجعوا المفسرين المعترضين قالوا : طب ازاي نفسر ان معلمنا يوحنا قال القصة حصلت في بيت مريم اخت لعازر بينما متي ومرقس قالوا حصلت في بيت سمعان الابرص ( وهو شخص مختلف وقد كان من الشهود علي صلب يسوع وشهد بانه بار وذلك مدون علي اللوح النحاسي الذي تم اكتشافه في اكويلا التابعة لنابولي عام 1280م ومحفوظ حاليا بدير رهبان الكارتوزيان القريب من نابولي)

معرفوش يردوا ....

الرأ ي القوي بقي ان مريم سكبت الطيب مرتين علي السيد المسيح :

المرة الاولي : كانت في بيتها قبل الفصح بستة ايام اللي ذكرها يوحنا12 .. كانت جايبة قارورة طيب جديدة فتحتها ودهنت السيد المسيح منها

المرة التانية : بعد اربع ايام عرفت مريم ان في عزومة في بيت سمعان الابرص خدت مريم باقي القارورة وراحت علي بيت سمعان الابرص وسكبت باقيها وكسرتها عشان ينزل كل الطيب اللي فيها .

وبكده تكون روايات الاناجيل الاربعة كلها صحيحة ومفيش اي تعارض بينها ....


رجعوا اعداء الكتاب وقالوا :

انتوا كدابين والمراة الخاطئة هي نفسها مريم اخت لعازر ...

طب يا عم ايه دليلكم ؟ قالك عندنا دليلين :

اول دليل : (متي ومرقس) ما ذكروش اسمها صراحة .. كانوا خايفيين من التشهير بها زي ما حصل مع ( لوقا ) ما ذكرش اسم المراة الخاطئة كان خايف يشهر بيها ؟؟!!!!



تاني دليل : انتو بتقولوا اول مرة دهنت مريم يسوع بالطيب كان في يوحنا 12

طب ارجعوا كده للاصحاح اللي قبله اصحاح11 وشوفوا يوحنا قال ايه ؟.. " 1وكانَ إنسانٌ مَريضًا وهو لعازَرُ، مِنْ بَيتِ عنيا مِنْ قريةِ مَريَمَ ومَرثا أُختِها. 2وكانَتْ مَريَمُ، التي كانَ لعازَرُ أخوها مَريضًا، هي التي دَهَنَتِ الرَّبَّ بطيبٍ، ومَسَحَتْ رِجلَيهِ بشَعرِها." (يو11: 1)

(دهنت ) فعل ماضي - والمرة الوحيدة اللي ادهن فيها يسوع بالطيب قبل كده كانت في لوقا7 من المراة الخاطئة اذن مريم اخت لعازر هي المرأة الخاطئة .


للاجابة علي اعداء الكتاب : -

+ نرد علي الدليل الاول وهو سبب عدم ذكر اسم مريم اخت لعازر في انجيلي متي ومرقس صراحة ؟

لانهم وقت كتابة اناجيلهم (بعد سنة 70م) كانوا خايفين علي اسرة لعازر من الاضطهاد لان اسرة لعازر كانت كلها موجودة حيث عاش لعازر (40) سنة بعد ما اقامه السيد المسيح وصار اسقفا لقبرص لكن معلمنا يوحنا كتب انجيله ( بعد سنة 95م) كانت اسرة لعازر كلها اتنيحت لذلك كتب الاسم صراحة في يو12

+ نرد علي الدليل الثاني بالنسبة لما ذكر في انجيل معلمنا يوحنا

دي فروق في الترجمة ازاي يعني ؟ يعني احنا لما بنتكلم في العربي عن حاجات في الماضي بيكون كلامنا كله في الماضي لكن الماضي ده فيه حاجات حصلت قبل حاجات لكن في العربي كل كلامنا بيكون في الماضي لكن في الانجليزي الحقائق اللي حصلت في الماضي تاخد زمن الماضي البسيط اما اذا تم حدث قبل حدث لازم ياخد زمن الماضي التام ... طيب نرجع للترجمة الانجليزية ونشوف النص في يوحنا11





11:1

Now a certain man was sick, named Lazarus, of Bethany, the town of Mary and her sister Martha.


11:2

(It was that Mary which anointed the Lord with ointment, and wiped his feet with her hair, whose brother Lazarus was sick.)




نلاقي هنا بيذكر مريم انها دهنت السيد المسيح بالطيب في زمن الماضي البسيط كحقيقة حصلت في الماضي
ولو كانت حصلت قبل اليوم السادس قبل الفصح كان ذكرها في زمن الماضي التام لانها كانت هتكون اقدم





ودلوقتي هنتأمل في حكاية المراة الخاطئة اللي قالنا عليها معلمنا لوقا في لوقا7

"

36وسألهُ واحِدٌ مِنَ الفَرِّيسيِّينَ أنْ يأكُلَ معهُ، فدَخَلَ بَيتَ الفَرِّيسيِّ واتَّكأَ. 37وإذا امرأةٌ في المدينةِ كانَتْ خاطِئَةً، إذ عَلِمَتْ أنَّهُ مُتَّكِئٌ في بَيتِ الفَرِّيسيِّ، جاءَتْ بقارورَةِ طيبٍ، 38ووَقَفَتْ عِندَ قَدَمَيهِ مِنْ ورائهِ باكيَةً، وابتَدأتْ تبُلُّ قَدَمَيهِ بالدُّموعِ، وكانَتْ تمسَحُهُما بشَعرِ رأسِها، وتُقَبِّلُ قَدَمَيهِ وتدهَنُهُما بالطِّيبِ. 39فلَمّا رأَى الفَرِّيسيُّ الذي دَعاهُ ذلكَ، تكلَّمَ في نَفسِهِ قائلاً:"لو كانَ هذا نَبيًّا، لَعَلِمَ مَنْ هذِهِ الاِمرأةُ التي تلمِسُهُ وما هي! إنَّها خاطِئَةٌ". 40فأجابَ يَسوعُ وقالَ لهُ:"ياسِمعانُ، عِندي شَيءٌ أقولُهُ لكَ". فقالَ:"قُلْ، يامُعَلِّمُ". 41"كانَ لمُدايِنٍ مَديونانِ. علَى الواحِدِ خَمسُمِئَةِ دينارٍ وعلَى الآخَرِ خَمسونَ. 42وإذ لم يَكُنْ لهُما ما يوفيانِ سامَحَهُما جميعًا. فقُلْ: أيُّهُما يكونُ أكثَرَ حُبًّا لهُ؟". 43فأجابَ سِمعانُ وقالَ:"أظُنُّ الذي سامَحَهُ بالأكثَرِ". فقالَ لهُ:"بالصَّوابِ حَكَمتَ". 44ثُمَّ التفَتَ إلَى المَرأةِ وقالَ لسِمعانَ:"أتَنظُرُ هذِهِ المَرأةَ؟ إنِّي دَخَلتُ بَيتَكَ، وماءً لأجلِ رِجلَيَّ لم تُعطِ. وأمّا هي فقد غَسَلَتْ رِجلَيَّ بالدُّموعِ ومَسَحَتهُما بشَعرِ رأسِها. 45قُبلَةً لم تُقَبِّلني، وأمّا هي فمنذُ دَخَلتُ لم تكُفَّ عن تقبيلِ رِجلَيَّ. 46بزَيتٍ لم تدهُنْ رأسي، وأمّا هي فقد دَهَنَتْ بالطِّيبِ رِجلَيَّ. 47مِنْ أجلِ ذلكَ أقولُ لكَ: قد غُفِرَتْ خطاياها الكثيرَةُ، لأنَّها أحَبَّتْ كثيرًا. والذي يُغفَرُ لهُ قَليلٌ يُحِبُّ قَليلاً". 48ثُمَّ قالَ لها:"مَغفورَةٌ لكِ خطاياكِ". 49فابتَدأَ المُتَّكِئونَ معهُ يقولونَ في أنفُسِهِمْ:"مَنْ هذا الذي يَغفِرُ خطايا أيضًا؟". 50فقالَ للمَرأةِ:"إيمانُكِ قد خَلَّصَكِ، اِذهَبي بسَلامٍ".

مين الفريسيين ؟ :

هم ناس متدينون شكلا وحافظين الايات وعارفين قواعد الناموس ولحد النهارده في ناس زيهم مواظبين علي حضور الكنيسة والاجتماعات وطول النهار ظابين الهيكل ... حافظين الطقوس تمام ... يرنموا مفيش مانع يدفعوا العشور بالمضبوط بالشعراية ... كل ده وربنا مش في حياتهم ...ممكن نلقاه كل شوية يدعي ابونا فلان يعملوا قنديل وابونا علان يعملوا تربوا ... لكن من باب التباهي عشان الناس تقول ده راجل مضبوط وقالهم الرب في مز50 " 16وللشِّرِّيرِ قالَ اللهُ:"ما لكَ تُحَدِّثُ بفَرائضي وتحمِلُ عَهدي علَى فمِكَ؟ 17وأنتَ قد أبغَضتَ التّأديبَ وألقَيتَ كلامي خَلفَكَ. 18إذا رأيتَ سارِقًا وافَقتَهُ، ومع الزُّناةِ نَصيبُكَ. 19أطلَقتَ فمَكَ بالشَّرِّ، ولسانُكَ يَختَرِعُ غِشًّا. 20تجلِسُ تتكلَّمُ علَى أخيكَ. لابنِ أُمِّكَ تضَعُ مَعثَرَةً. " (مز50)

طب يا يسوع لما يدعيك واحد فريسي تروح له ليه ؟ قالك اروح له يمكن يتوب ويعرف اني عايز قلوب الناس مش فلوسها

امرأة كانت خاطئة في المدينة :

يعني ايه .. يعني ست وحشة والناس كلها عارفاها فلانة بنت فلان وحشة ... طب ايه جابك انتي يا شريرة يا وحشة ليسوع قالت الرجاء هو اللي جابني الرجاء خلاني اعرف انه هيقبلني .... والعجيب ان يسوع قبلها وقبل اكرامها ليه ....

عايزين كل واحد مننا يبص لنفسه : هل احنا بنقبل الناس باسم المسيح ولا فلان ابعد اقاطعه عشان اخلاقه وحشة وفلانة ما اكلمهاش عشان فيها كيت وكيت ... ما هو احنا اذا قطعنا رجاء الناس دي هيغوروا في داهية لازم نتعامل معاهم

امرأة كانت خاطئة في المدينة ... وقبلتها يا يسوع ؟ يقولك ايوه عشان انا ما جيتش ادعي ابرار انا جاي عشان الخطاه... الناس اللي في الخمارة والناس اللي سكتها بطالة والناس اللي بتشرب بانجو والناس اللي بتلعب قمار ... دول عايزهم لازم يسمعوا صوتي جاءت من ورائه ... ليه مكسوفة مش عارفه توريه وشها .. وراحت علي قدميه تبلهما بالدموع وتمسحهما بشعر راسها ... راحت علي قدميه لانهما هما اللي هيودوها طريق البر اللي ما كانتش تعرفه ... وطب بتمسح قدميه بشعرها ليه ... لان الشعر رمز المجد عند المراة فهي وضعت مجدها عند قدميه .. هل احنا بنضع مجدنا عند قدمي المسيح ... ده لو حد غلط فينا وحب يعتذر لنا ممكن ما نقبلهوش انا اكلم فلانة تاني ولا لساني يخاطب لسانها ... انا اروح لها البيت ابدا ده لو شنقوها ....