عصا الاشرار وعصا الرب

عصا الاشرار وعصا الرب

(يتمجد اسمك ويتعظم روحك القدوس وتجعلها كلمة منفعة)

" من المَزمورُ المِئَةُ والخامِسُ والعِشرونَ"

"3لأنَّهُ لا تستَقِرُّ عَصا الأشرارِ علَى نَصيبِ الصِّدِّيقينَ، لكَيلا يَمُدَّ الصِّدِّيقونَ أيديَهُمْ إلَى الإثمِ."

من هو الصديق ؟

+ هو المؤمن اللي بيسقط ويقوم لكنه عنده رغبة دائمة في التوبة وعمل الخير0زي ما بيقول الكتاب في سفر الامثال24

"16لأنَّ الصِّدِّيقَ يَسقُطُ سبعَ مَرّاتٍ ويَقومُ، أمّا الأشرارُ فيَعثُرونَ بالشَّرِّ."(ام24 : 16)

+ كمان الصديق هو اللي رغم انه بيعمل خير لكنه بيتعرض للخطأ زي ما قالنا الكتاب في جامعة7 .

" 20لأنَّهُ لا إنسانٌ صِدِّيقٌ في الأرضِ يَعمَلُ صَلاحًا ولا يُخطِئُ. " (جا7: 20)

هل تستقر عصا الاشرار ؟

المزمور بيقولنا (لا تستقر)... امال ايه اللي بيحصل ؟

اللي بيحصل ان عصا الاشرار  بتنزل علي الصديقيين

وكل واحد تنزل عليه عصاية كد ما يحمل لكن ربنا مش بيسمح باستقرار العصا لانه لا يسمح بان نجرب فوق ما نستطيع نراجع كورنثوس10  "اللهَ أمينٌ، الذي لا يَدَعُكُمْ تُجَرَّبونَ فوقَ ما تستَطيعونَ، بل سيَجعَلُ مع التَّجرِبَةِ أيضًا المَنفَذَ، لتستَطيعوا أنْ تحتَمِلوا.  " (1كو10: 13)...

كمان ربنا عارف امتي نستحمل عصا الاشرار وامتي ما نقدرش نستحملها:

ساعات نكون في حالة روحية سيئة ما نقدرش نستحمل اي تجربة قوم ربنا يحوش عصا الاشرار عننا وما يسيبهاش تنزل زي ما حصل مع التلاميذ في يوحنا 18 لما طلعوا علي السيد المسيح بالمشاعل والسيوف عايزين يمسكوه وسألهم من تطلبون يعني انتوا عايزين مين ؟ قالوا له يسوع قالهم " فإنْ كنتُم تطلُبونَني فدَعوا هؤُلاءِ يَذهَبونَ". 9ليَتِمَّ القَوْلُ الذي قالهُ: "إنَّ الذينَ أعطَيتَني لم أُهلِكْ مِنهُمْ أحَدًا " (يو18: 8)

السيد المسيح ما سمحش  ان العصا تنزل علي التلاميذ لانهم ما كانوش هيحملوا

او بمعني اصح كانوا هيهلكوا .....

في ناس بتقول ان عصا الاشرار استقرت علي الصديقين :

والناس دي بتقول انتوا مش شايفين عيال ربنا اللي بتموت كل يوم من عصا الاشرار والناس اللي بيتخرب بيوتها والناس اللي بيخطفوها .. تبقي العصا استقرت ونص ...

نناقش الرأي ده بشوية اسئلة :

هل الرب قدم ضمان لكل صديق انه هيموت علي سريره ؟ طبعا لأ ...

هل الرب قدم ضمان لكل صديق انه هيعيش في تبات ونبات ويخلف صبيان وبنات ؟ طبعا لأ ...

هل الموت يعتبر شر وعقاب من ربنا بالنسبة للمؤمن ؟ .. طبعا لأ

لكن اللي بيحصل ان اسباب الموت بتتعدد في واحد بيموت غرقان وواحد بيموت في حادث وواحد بيموت بمرض وواحد بيموت بعصا الاشرار وزي ما بيقول الشاعر :

من لم يمت بالسيف مات بغيره  + تعددت الاسباب والموت واحد

الوعد انه يكون معانا في الضيقات ... مش ان الضيقات تختفي

عشان كده عدا مع شعبه في البحر وقعد مع الفتية في النار ومع دانيال في الجب ومع بولس في السجن ومع ارملة صيدا في العوز والجوع ....

وكل التلاميذ ما عدا يوحنا الحبيب ماتوا بعصا الاشرار كمان وهم عايشين اتعرضوا كتير لعصيان الاشرار من ضرب واضطهاد وسجن واهانة ... لكن رغم كده ما نقدرش نقول ان عصا الاشرار استقرت لانها لو استقرت ما كانوش عرفوا يبشروا وما كانتش الكلمة وصلت لملايين .. لكن اللي بيحصل ان عصا الاشرار بتنزل علينا دب .. دب ... دب ... وبعد مدة لما نصلي ربنا يقول اه ولادي تعبوا قوم يتدخل ويكسر يدين الاشرار زي ما بيقول المزمور37 :

" 17لأنَّ سواعِدَ الأشرارِ تنكَسِرُ، وعاضِدُ الصِّدِّيقينَ الرَّبُّ.  " (مز37: 17)

صدقوني ... اذا الصديق عاش في دنيا هادية وكانت كل حاجة تمام ومفيش اي مشاكل معاه ... يبقي في حاجة غلط لازم يراجع نفسه لأن ده مش كلام الكتاب

السؤال: هل يمكن أن يكون لعصا الاشرار نتائج مفيدة؟

عصا الاشرار تعطي اكاليل النصر :

الكتاب بيقول لازم نجاهد ونتعب عشان ناخد اكاليل زي ما بولس الرسول كان بيوصي تلميذه تيموثاوس في رسالته التانية اصحاح2 وعدد3 بيقوله :

" 3فاشتَرِكْ أنتَ في احتِمالِ المَشَقّاتِ كجُنديٍّ صالِحٍ ليَسوعَ المَسيحِ. 4ليس أحَدٌ وهو يتجَنَّدُ يَرتَبِكُ بأعمالِ الحياةِ لكَيْ يُرضيَ مَنْ جَنَّدَهُ. 5وأيضًا إنْ كانَ أحَدٌ يُجاهِدُ، لا يُكلَّلُ إنْ لم يُجاهِدْ قانونيًّا.  " (2تي2: 3)

وعصيان الاشرار هي اللي الطريق للاكاليل زي ما قال معلمنا بولس في الاصحاح التامن من رسالته لرومية  :

" . إنْ كُنّا نَتألَّمُ معهُ لكَيْ نتمَجَّدَ أيضًا معهُ. " (رو8: 17)

رسالة بولس إلى أهل رومية ٥: ٣ ـ ٥ ـ ـ نحن نفتخر بالشدائد، لأن الشدة تلد الثبات، الفوز بالامتحان، والرجاء

تؤدي عصا الاشرار إلى النمو الروحي :

ومن ثمار النمو الروحي (الصبر) كما يقول معلمنا بولس :

" بل نَفتَخِرُ أيضًا في الضِّيقاتِ، عالِمينَ أنَّ الضِّيقَ يُنشِئُ صَبرًا، 4والصَّبرُ تزكيَةً، والتَّزكيَةُ رَجاءً،  " (رو5: 3)

ومعملنا يعقوب يتفق مع هذا الرأي :

"2اِحسِبوهُ كُلَّ فرَحٍ يا إخوَتي حينَما تقَعونَ في تجارِبَ مُتَنَوِّعَةٍ، 3عالِمينَ أنَّ امتِحانَ إيمانِكُمْ يُنشِئُ صَبرًا.  " (يع1 : 2)

تبقينا عصا الاشرار متواضعين ومتكلين على الله

تعالوا نقلب بعض الاحداث ونتأمل شوية :

+ لو كان ابونا يعقوب اعتمد علي قوته الشخصية (وربنا مديه قوة بدنية كبيرة لانه حرك حجر البئر اللي كان الرعاة بيستنوا بعض عشان يقدروا يحركوه) وقال احسن حاجة اموت عيسو وراح قتل عيسو .. ايه كان كان هيحصل ؟ هل كان الله هيفتح له السماء ويوريه السلم النازل من السماء الي الارض ويعزيه ؟!!!

+ لو كان جدعون نزل بال (32000) راجل وحارب المديانيين وانتصر عليهم كان يشوف عمل الرب وان العدد القليل ده يغلب وحوش الظلام اللي حواليه 
+ لو كان ارميا النبي الدنيا مستريحة معاه وغني زي  الملك اخاب وعنده قصر من عاج هل كان هيشوف المعجزات اللي شافها وربنا يخلي الغراب اللي بيسيب عياله بالجوع يجيب اكل ارميا ؟ والارملة اللي مش لاقية تاكل تعوله ؟!!

كل عصيان الاشرار اللي بتتعبنا في الحياة .. من ظلم واضطهاد ومعاناه ومشاكل

قادر الرب ان يحولها لخير لينا ولعيالنا .. مش هنخاف طول ما مسنودين علي عصايته 

في سؤال هنا / هل ممكن الصديقون يمدوا ايديهم الي الاثم

ممكن ... ساعات تضيق الدنيا علي الصديق يتهيئ له ان عصا الاشرار استقرت ويبتدي يمد يديه الي الاثم

+ داود لما طلب اكل من نابال الكرملي ومرضيش

" 13فقالَ داوُدُ لرِجالِهِ:"ليَتَقَلَّدْ كُلُّ واحِدٍ مِنكُمْ سيفَهُ". فتقَلَّدَ كُلُّ واحِدٍ سيفَهُ، وتقَلَّدَ داوُدُ أيضًا سيفَهُ.  " (1صم25: 13)

رايح فين بسيفك يا داود يقول لك ما هو عصا الاشرار استقرت ... واحد زي نابال يشتمنا ويهينا وعايز يقعدنا لحد ما نموت من الجوع لازم اوريه مقامه.... يعني كان هيمد يده للاثم

+ كمان نبص علي معلمنا بطرس في مرقس14

نلقاه شاف يسوع اللي اتبعه وهو بيضرب بالبوكس في وشه وناس بتف عليه وناس بتلطشه بالقلامة ...قالك ايه ده ايه ده ... لازم عصا الاشرار استقرت وضعف وانكر السيد المسيح 3 مرات مش بس كده اشتغل سب وحلفان بالكدب يقول الكتاب

"  ⁷¹فابتَدأَ يَلعَنُ ويَحلِفُ " (مر14: 71) يعني مد يده للاثم

في مقابل عصا الاشرار نشوف عصا الرب

في مقابل عصا الاشرار لازم المؤمنين يلاقوا عصا شديدة تحميهم من الاشرار وهي عصا الرب ... نقوله طب انت يا رب هتسيبنا لعصا الاشرار تطحنا .. يقول لأ دا انا معايا عصاية شديدة هي عصاية ابني يسوع المسيح وهي الصليب

عصا الرب دي هي اللي بتحمينا :

بس المهم اننا نقبل العصا دي ونحطها فوق راسنا فندخل في عهد الرب زي ما قال معلمنا حزقيال في حز20

" 37وأُمِرُّكُمْ تحتَ العَصا، وأُدخِلُكُمْ في رِباطِ العَهدِ. " (حز20: 37)

ولما نقبل عصاية الرب علي راسنا هنفرح لانها بتحمي من كل شر ومفيش عصاية تانية تقدر تقف قدامها زي ما قال معلمنا حزقيال في حز21

" عَصا ابني تزدَري بكُلِّ عودٍ. " (حز21: 10)يعني تأكل عصيان الاشرار كلها ..

زي ما حصل مع ابونا موسي وعصا الله ابتعلت عصيان الاشرار ...

 و هي اللي بتفتح الطريق قدامنا :

لو خايفين هتشق البحر لو عطشانين هتشق الصخر لو تقلتنا الخطايا وغصنا زي الحديد في البحر تقدر عصا الرب ترفعنا

و هي اللي بتعزينا :

في مزمور 23 " عصاك وعكازك هما يعزيانني "

لان التعزية الحقيقية هي في الصليب والراحة الحقيقية تحته

طب وعصا الاشرار هتعمل ايه فيها يا رب ؟؟؟

يقول معلمنا اشعياء : في اش15 :

" 5قد كسَّرَ الرَّبُّ عَصا الأشرارِ، قَضيبَ المُتَسَلِّطينَ. 6الضّارِبُ الشُّعوبَ بسَخَطٍ، ضَربَةً بلا فُتورٍ. المُتَسَلِّطُ بغَضَبٍ علَى الأُمَمِ، باضطِهادٍ بلا إمساكٍ. 7اِستَراحَتِ، اطمأنَّتْ كُلُّ الأرضِ. هَتَفوا ترَنُّمًا. " (اش15: 5)

(لالهنا كل المجد دائما ابديا امين )